مش لاقي اسم و عاوز اعيط

الموضوع بقى شبه رسمي...

انا اقدر اقول ان العيال - جميع الاعمار والمقاسات والاشكال و الالوان- بقت تجنني، وجنان من اللي انت تكرهه.

زمان لو العيل هادي و طيب و متربي كويس كان ممكن - صعب بس ممكن- العب معاه او اكلمه، انما حاليا معدتش اقدر استحمل خالص فكره ان يبقى في عيل جنبي  او في نفس الاوضه ويستحسن لو يكون بره الشقه اصلا، و مش بس علشان اخلص من ليه و ازاى واشمعنى و ايه ده وايه دي و ايه اللي حط " الشيء" ده جنبي اصلا!

دايما لازم تكون عنيك مفتحه و لو تعرف تجيب عنين على عنيك كمان مش هيكفوا، زمان - قوي- كانت لمبة الزيت بتتحت فحته عليا العيل ميقدرش يوصل ليها غير بعد ميتم ثمنتاشر سنه، و الراديو وباجور الجاز والكبرييت و الكتب وكل حاجه ممكن تتخيلها.

حاليا حضرتك تجيب كمبيوتر و ولاد ال... اللي هما مش ضروري ولادك - ممكن ولاد اخواتك ولاد الجيران ولاد صاحبك او ولادك- يضربوا عليه، وورينا شطارتك يا معلم و انت بتقومهم من عليه - لو عرفت تقرب اصلا- علشان تخلص شغل او تلحق تعمل حاجه في المصيبه اللي عملوها فيه، واملك الوحيد علشان تلمسه لما الوندوز يضرب وتروح تصلحه - علشان يضربوهولك تاني!

عامل الامان دلوقتي زاد، معدش في لمبة جاز او كبريت اللي يخليك خايف على الواد- مع انه يستاهل الحرق- بس الحجات بقت اغلى و اصغر، مثلا لما حضرتك تجيب موبايل جديد و بحسن نيه تنقل كل الارقام اللي كانت في تلفونك القديم ليه، و يبقى عندك " شيء" من دول عندك و يستلم " العده" منك، بقدرة قادر- وربك قادر قوي- تلاقيه بيطلب النمره الوحيده - الوحيده الوحيده- اللي انت عاوز تموت قبل متطلبها في اسواء وقت ممكن، مثلا يطلب عشقتك ومراتك قاعده جنبك، او مثلا الراجل اللي انت مديون ليه بمبلغ وقدره 

- ومش معرفة النمرة دي اصلا- فاخر الشهر، ولو سرحنا شويه ممكن يطلب تاجر الحشيش بتاعك لما تكون عازم وزير الداخله على الغدا!!!!

عيال تودي في داهيه.

واللي يقرفك ان في عيل قاعد جنبي وانا بكتب الكام كلمه دول.... وعاوز اعيط.

اه ونص...

اه ونص و تلت تربع....

يعني لو حسبتها صح هيطلعلك اتنين اه و ربع.

طبعا كل مواقع الجواز والتعارف على النت هتقلك "اه" هتلاقي نصك التاني عندنا، اه ونص وتلت تربع كمان.

بقالي مده مسجل فكام موقع منهم - على اساس اني الاقي نصي التاني- ومنهم موقع متابع فيه و بدفع الاشتراك الخ الخ...

خمس سنين!

ده لو حد سال بقالي قد ايه و لا لو حد سال لاقيت نصك التاني ولا لسه.

الموقع لو مبتدفعش بيسمحلك تشوف البروفايلز بتاعت - في حالتي- البنات اللي على الموقع، و ممكن تبعت رساله  تظهر فيها اهتمامك- اللي الموقع مشكورا كاتبهلك.

لما بتدفع يا معلم تقدر تشوف البروفايل ده نشيط ولا مش، تعمل شات وتبعت الرسايل اللي انت كاتبها الخ الخ.

صاحبكم - اللي هو انا- سخن واتشجع واتحمس وبقى عنده امل - مع انه عارف انها ماتت من زمان وادفنت كمان والعزاء بتاعها اتاخد-  ودفع في الموقع.

اصلك لما تدخل الموقع ويقلك ان فرح خميس و خميسه كان الخميس اللي فات و انهم عرفوا بعض على الموقع الخميس اللي قبليه، وتفتح الاميل بتاعك وتكتشف ان عنتر عرف عبله عن طريق الموقع ده ومش سوق عكاظ زي ما المناهج "المضلله" عاوزاك تفتكر والموقع ده هو اللي "شار" على شهرزاد انها تحكي لشهريار حدوته كل ليله وانهم هما اللي عملوا الف ليله وليله كخدمه" بعد البيع"  حرصا منهم على نجاح الجوازات اللي بداءت عندهم مش هتقدر تعمل اي حاجه غير انك تسجل.

و طبعا دخلت ولاقيت بنت و الواحد قال ايوه بقى  الفرح الخميس الجاي بقى، اللي ميعرفنيش، انا ممكن اخد غطس في محرك مركب حجمه اكبر من اتوبيس النقل العام منغير ماخاف او لو مفيش حل سلمي ممكن ادخل خناقه مع عشر شباب لوحدي، بس لما تقولي كلم البنت دي تلاقيني بعرق ومرعوب و عامل زي الكتكوت الغرقان،المهم كتبت للبنت - ازاي متسالش- انا فلان -مع ان اسمي مكتوب عندها- انت اسمك ايه؟

- فلانه

- الاسم ده جميل قوي

- مرسي

-فتره من الصمت-

اكتب ايه اكتب ايه اكتب ايه

معرفتش وهي مشكوره طنشت، وعدت على خير، معلش اول مره و مرتبك وخايف اعك المره الجايه هتظبت خليك متفائل المره الجايه فالجول يا معلم.

وفعلا جت فالجول، لاقيت واحده وجمعت كل الشجاعه اللي عندي وكلمتها، كتبت هاي وردت لحظه واحده.

لحظه واحده !!!

ماشي ، ببص كده يا معلم لاقيتها بتفتح البروفايل بتاعي وبتبص فيه، وردت ويارتها مردت. 

انت ايه؟ بطل معاكسه وقلة ادب انا عاوزه واحد ارتبط بيه في علاقه جاده، انت يادوبك متخرج ولسه تحت التدريب، ايه بنات الناس لعبه؟

وقفلت

وانا فصلت، ايه اللي حصل ده !!!

 البروفايل بتاعي كان عادي مكنتش بالف ولا بكدب وكاتب اني متخرج ومتعين مهندس تحت التدريب، يعني لسه بكون نفسي، يعني - من وجه نظرها- مش جاهز!

و استمر مسلسل الفشل  ومفيش واحده عندها استعداد ترتبط بيك.

الجميل انك لما تبص على البروفايلز بتوع البنات هتلاقي التالي:

لو البنت عندها واحد وعشرين سنه تبقى عاوزه واحد بين سته وعشرين و تلاتين - وده عادي ومعقول.

مش مهم المستوى المادي بس يكون عنده بيت وعربيه وشغاله وياخدني شهر العسل فباريس!

ملتزم و بيصلي و حافظ القران ويكون "روش" وبيسمع اغاني وبيحب الخروج والفسح والسفر!

جاد و محافظ  ومش معقد  بيحب الهزار و بيهرج وميقفش و مياخدش اي حاجه جد !!!!!!!!

يكون وسيم وشبه مهند ويستحسن لو تركي !!!!

الخ الخ من المواصفات اللي متركبش على بعض اساسا، وانت تقرا وتبقى بتسال نفسك : وده بتلاقيه في انهي سوبرماركت ولا بتروحي للخراط يعملهولك حسب الطلب ؟؟!!

المشكله انها مش واحده ولا اتنين، دول كتير قوي ، قوي، لدرجة انك ممكن تبداء تشك فنفسك انك مش بني ادم اصلا او ان الموقع ده موقع جواز لسكان المريخ وخميس و خميسه من المريخ اصلا!

الفكره اللي فبالي دلوقتي اجرب اغير البروفايل بتاعي و احط رجل اعمال و ان عندي بدل الشقه خمس فلل فالمقطم و سياره، لا طياره و عزبه في القناطر و اجيب صورة ولد "روش طحن" بس "بدقن وزبيبة صلاة"
 واشوف...

يمكن البنات تدخل وتبص على البروفايل بتاعي!

طال البعاد

عاملين ايه ؟

بقالي مده طويله مكتبتش حاجه و ابقى بكدب لو قلت اني كنت مشغول، بس مكنش عندي اي حاجه اكتبها.

عموما الاحوال مكنتش كويسه، في كل المستويات، الشغل مش موجود ولو لاقيت بيبقى منيل - او على الاقل المرتب- والحياة الشخصيه ولاجتماعيه صفر او اقل بشويه واديها ماشيه.

مش عارف انا عاوز ايه وعمال بلف حوالين نفسي، اللي مجرب الموضوع ده نصيحه متجربهوش احسن، واللي مجرب- ربنا يديك الصحه.

لو ربنا سهل الامور هرجع اكتب بانتظام.

سلام دلوقتي

انا طير فالسما

النهارده رحت interview لشغلانه، ابويا - مشكورا- شاف واحد صاحبه اللي شاف واحد صاحبه - عنده شركة- اللي شافلي شغلانه عنده.

لغاية كده وكلوا عال العال، اللي مش عال هو الشغلانه.

ابويا  وصاحبه وصاحبه التاني عقدوا لجنة عليا، تمخضت عن قرار حكيم اني اشتغل مندوب مبيعات.

بتقول ايه، اه انا سامعك انت يا واد يا طويل يا قصير وانت بتقول : هو حد لاقي؟؟!!

اه، انا لاقي - واه انا مفتري- ومش عاجب أ... عاجبني ولعدة اسباب وجيهه،  اولها و اهمها اني انا - واعوذ بالله من كلمة انا- ميكانيكي مراكب؛ قصدي مهندس بحري.

برضو انت بتتكلم تاني، مش كفايه مره واحده عليك؟؟؟

بتقول ايه؟ اه، مين ده اللي بيشتغل بالشهاده بتاعته؟

ماشي انا الكبير و مش هرد عليك - ولو اني نفسي اتكلم فالموضوع ده بس الجيات ابقى-المهم، اللجنا العليا في ضوء ان مندوب المبيعات في شركه هندسيه لازم يكون مهندس؛ وده كلام صح ومنطقي - الي حد ما، شافت اني هستفيد استفاده ما بعدها استفاده من الشغلانه دي في اني هكون معارف واتصالات في مجالي اللي هيديني افضليه لما ادور على شغلانه بعد كده.

بكل اسف ده صح نظريا، بس فالواقع ان هكون اتصالات ومش هكسب اي خبره هندسيه تنفعني في اي شغلانه، وعليه لما ادور على شغلانه تانيه هدور على شغلانة مندوب مبيعات- مع فائق الاحترام للساده و السيدات مندوبي ومندوبات المبيع والمبيعات.

ياه اخيرا تقول حاجه انا وانت متفقين عليها

 " كلام سليم"

"بس" قول الكلمتين دول لابويا- ومنغير متكون واخد ساتر- و ساعتها هتقابلني على ارتفاع 10000 متر، ده اللي انا عملته والرد كان:

انت بتفهم حاجه يا... ولا بلاش اكتبها، انت  بتت....خليها بتدلع، انت ابن .... الي اخره مما لذ وطاب من الكلمات التشجيعيه اللي تخليك طاير فالسما.

الواحد بقى من كتر التشجيع - اللي فالعضل - مش عارف يروح فين، انا فاضلي شويه تشجيع وهحتاج بدلة فضاء.

اشوفكوا لما نزل.

و ابتدا المشوار......واه يا خوفي من اخر المشوار

السلام عليكم

مجرد فكره جت فبالي وقلت اجربها

المواطن المصري - والعربي عموما- زيه زي اي انسان تاني حياته بتبداء بالولاده وتنتهي بالموت ، بس المواطن العربي -والمصري تحديدا علشان محدش يقولي انت بتتكلم عننا ليه!!؟؟؟- يعتبر بكل المقايس "كائن وحيد المهمه" على اساس انو بيعيش حياته على مراحل وملهوش غير هدف واحد فكل مرحله

مثلا مرحلة الثانويه العامه:

الطالب ميقدرش يكح لو الكحه هتتعارض مع المذاكره ، كل حياته مركزه على المدرسه والدروس والمجموعات....الخ ، وممنوع منعا باتا انه يلعب او يشوف اصحابه او مجرد التفكير انو انسان ليه احتياجاته ، الهدف الوحيد- اللي الكون كله مسخر ليه في المرحله دي- هو النجاح

والحصول على شهادة الثانويه العامه بمجموع يؤهل لكليه كويسه

ده مثال لمرحله من المراحل - ومش هتكلم عن التعليم ليتقال اني معارض ولا يضموني للقله المندسه- وعموما ربنا كرمني وتخطيت المرحله دي من زمان -هو مش زمان قوي  ده انا لسه شباب - والمرحله اللي بعديها واللي بعديها

مشكلتي- ومشكلة المدونه دي- المرحله -السودا- اللي انا فيها حاليا

مرحلة الجواز

المرحله دي في الترتيب الطبيعي للاحداث المرحله اللي قبل خلفة العيال اللي هي بعديها الموت -قمة التفاؤل- وممكن نحشر فالنص تربية العيال وتعلمهم الى اخره من محاولات المماطله، قبل منوصل لمرحلة الموت

المرحله - السودا- اللي انا فيها هدفها الجواز، لو كنت بدأت الكتابه من اسبوع، غالبا كانت المدونه دي اسمها أنا عاوز اتجوز ، بس بما اننا اولاد النهارده ، فالمدونه دي اسمها

انا مش عاوز اتجوز

الحجات اللي هتتكتب منها الواقعي واللي حصل ومنها الخيال

ربنا يستر من اخر المشوار